मेरा द्वी पुराणा नंहेदरा अबि बि उन्नी नहेणा छा जन कि कुछ नि देखि हो वून। पर भितरि-भितर त बोन्ना रै होळा, ज बेट्टा हौर जा, ज ज जा नह्यो। अर मि स्वच्णु छौ कि नह्यों कन मा। अब लोट्या त छैं नी छौ मैमा कि मि बि भैर इ भैर नहे जांदू, इलै मिन बि दुस्री तरफां अपड़ा खुट्टा पाणि म डळनि, अर हत्थू न मत्थि सरील म पाणि डळण बैठ ग्यों। थ्वड़ा देरौ तै पाणि म खुट्टि डळ्दू, फेर एक मिन्ट से पैलि भैर, अर दुबारा फेर से ऊई नाटक। थ्वड़ा देरम एक बाबाजी ऐनी, रै होला नब्बे का हेर फेरम। अर औंद्वी सीदा कुंडम, वु बि सीदा सोता मुखम जैकि आराम से नहेण लग गैनि। मि वुं बाबाजी तै बस देख्ण्यु इ रयुं। इबारि तक म्यरा गौणा बि ये गरम पाणि का हभ्यस्त व्हे गै छा, त मि बि कुंडम पूरू हि चल ग्यौं। पाणि अबि बि भौत तातू लगणु छौ, पर मि आंखा बंद करि बद्रीबिसाळौ ध्यान क्न्न लग ग्यौं अर फेर त पता नि कद्गा डुबिकि मन्नी।
आज सबेरै ईं डुबिकि म मैतै यु समज म ऐगै छौ कि, जन आज या तप्त कुंडै डुबिकि छै उन्ही छन वे परमेस्वरै सीर सागरै डुबिकि बि। साधना का सुरु म बि उन्हि करंट लग्दु, जन वे पाणि म खुट्टु धरद्यु लगि छौ। किलै कि सध्यूं त छै नि च अर चाणा रंदाँ कि सीदा चरम मा पौन्छ जां। ये सरील तै विं परम सक्ति तै सैणै तागत इ नि रान्दि। पर उबारि डन्न से जादा जरुरि होन्दु धैर्य अर वीं परम शक्ति मा बिस्बास। अर दगड़म चयेंदु, सदगुरु कु आसिर्बाद अर साथ । ये सब कुछ होणा का बाद हि वे सीर सागर म डुबिकि लग पान्दि।
){kind=link}
0 Comments